ខ្យល់កន្ត្រាក់រលំ និងប៉ើងដំបូលផ្ទះ៣៤ខ្នង ស្លាប់ម្នាក់ របួស២នាក់ នៅមណ្ឌលគិរី
06-May-2016 | ដោយ មែន កំសត់
មណ្ឌលគិរី៖ សេចក្តីរាយការណ៍ពីសមត្ថកិច្ច ប្រចាំនៅខេត្តមណ្ឌលគិរី បានឲ្យដឹងថា នៅវេលាម៉ោងប្រមាណ៦ព្រលប់ថ្ងៃទី០៥ ខែឧសភា ឆ្នាំ២០១៦ ខ្យល់កន្ត្រាក់លាយឡំជាមួយភ្លៀងយ៉ាងខ្លាំង បានបោកបក់ទៅលើផ្ទះប្រជាពលរដ្ឋនៅភូមិពូតាង ឃុំពូជ្រៃ ស្រុកពេជ្រាដា ខេត្តមណ្ឌលគិរី បណ្តាលឲ្យផ្ទះប្រជាពលរដ្ឋ ៣៤ខ្នង បានរលំ និងប៉ើងដំបូល ហើយមនុស្សម្នាក់បានស្លាប់ និង២នាក់ទៀតបានរងរបួស។
សេចក្តីរាយការណ៍ បានបន្តថា រហូតដល់ម៉ោង ៩យប់នេះ ខ្យល់បានស្ងប់ស្ងាត់ទៅវិញហើយ ហើយជនរងគ្រោះ ក៏ត្រូវបានអាជ្ញាធរ និងសមត្ថកិច្ច បញ្ជូនទៅសង្គ្រោះផងដែរ។ បើតាមសេចក្តីរាយការណ៍ ក្នុងចំណោមផ្ទះ ដែលដួលរំលំ និងប៉ើងដំបូលនេះ ក៏មានផ្ទះនាយរងប៉ុស្តិ៍នគរបាលឃុំពូជ្រៃម្នាក់ផងដែរ។
បន្ទាប់ពីទទួលដំណឹងគ្រោះធម្មជាតិនេះភ្លាម ឯកឧត្តម ស្វាយ សំអ៊ាង អភិបាលខេត្តមណ្ឌលគិរី ក៏បានបញ្ជាទៅកាន់អាជ្ញាធរ និងសមត្ថកិច្ចក្នុងខេត្តចុះទៅស្រង់ស្ថិតិប្រជាពលរដ្ឋរងគ្រោះទាំងយប់ផងដែរ។ លោក ស្វាយ សំអ៊ាង ក៏គ្រោងនឹងយកអំណោយកាកបាទក្រហមខេត្តទៅចែកជូនប្រជាពលរដ្ឋនៅព្រឹកថ្ងៃបន្ទាប់នេះ ដើម្បីឲ្យពួកគាត់ដោះស្រាយទុក្ខលំបាក៕
ចំនួនអ្នកទស្សនា
- ថ្ងៃនេះ4101
- ម្សិលមិញ20231
- សប្តាហ៍នេះ83181
- ខែនេះ105061
- ឆ្នាំនេះ105061
- សរុប20547517